ओ दाई ......

( नवरात परब मा माता सेवा : भाग - 1 )

मूड़ मुकुट- मोती मढ़े , मुख मोहक - मुस्कान
नगन नथनिया नाक मा , कंचन - कुंडल कान       ओ   दाई ......

मुख   -मंडल चमके -दमके,धूम्र विलोचन नैन
सगरे जग बगराये मा ,   सुख -संपत्ति, सुख-चैन       ओ   दाई ......

लाल चुनर ,लुगरा लाली,लख-लख नौलख  हार
लाल चूरी ,लाल टिकुली,      सोहे सोला सिंगार          ओ   दाई ......

करधन सोहे कमर मा ,   सोहे पैरी पाँव
तोर अंचरा दे जगत ला ,सुख के सीतल छाँव        ओ   दाई ......

कजरा सोहे नैन मा ,मेहंदी सोहे हाथ
माहुर सोहे पाँव मा ,बिंदी सोहे माथ                          ओ   दाई.......

एक हाथ मा संख हे ,एक कमल के फूल
एक हाथ तलवार हे ,एक  हाथ तिरसूल                       ओ   दाई ......

एक हाथ मा गदा धरे ,एक मा तीर -कमान
एक हाथ मा चक्र हे ,       एक हाथ वरदान                 ओ   दाई ......

अष्टभुजा मातेश्वरी ,        महिमा अपरम्पार
तीनों लोक तोर नाम के , होवै जय जयकार               ओ   दाई ......

)शब्दार्थ :- ओ   दाई = ओ मईया या हे माँ,  मूड़ = सिर, सगरे जग बगराये = सारे जग में फैलाना, चूरी = चूड़ी, टिकुली = माथे का टीका या बिंदी, सोहे = शोभित होना, सोला = सोलह, अँचरा = आँचल)

अरुण कुमार निगम

आदित्य नगर, दुर्ग

छत्तीसगढ़