ओ दाई ......

( नवरात परब मा माता सेवा : भाग - 1 )

मूड़ मुकुट- मोती मढ़े , मुख मोहक - मुस्कान
नगन नथनिया नाक मा , कंचन - कुंडल कान       ओ   दाई ......

मुख   -मंडल चमके -दमके,धूम्र विलोचन नैन
सगरे जग बगराये मा ,   सुख -संपत्ति, सुख-चैन       ओ   दाई ......

लाल चुनर ,लुगरा लाली,लख-लख नौलख  हार
लाल चूरी ,लाल टिकुली,      सोहे सोला सिंगार          ओ   दाई ......

करधन सोहे कमर मा ,   सोहे पैरी पाँव
तोर अंचरा दे जगत ला ,सुख के सीतल छाँव        ओ   दाई ......

कजरा सोहे नैन मा ,मेहंदी सोहे हाथ
माहुर सोहे पाँव मा ,बिंदी सोहे माथ                          ओ   दाई.......

एक हाथ मा संख हे ,एक कमल के फूल
एक हाथ तलवार हे ,एक  हाथ तिरसूल                       ओ   दाई ......

एक हाथ मा गदा धरे ,एक मा तीर -कमान
एक हाथ मा चक्र हे ,       एक हाथ वरदान                 ओ   दाई ......

अष्टभुजा मातेश्वरी ,        महिमा अपरम्पार
तीनों लोक तोर नाम के , होवै जय जयकार               ओ   दाई ......

)शब्दार्थ :- ओ   दाई = ओ मईया या हे माँ,  मूड़ = सिर, सगरे जग बगराये = सारे जग में फैलाना, चूरी = चूड़ी, टिकुली = माथे का टीका या बिंदी, सोहे = शोभित होना, सोला = सोलह, अँचरा = आँचल)

अरुण कुमार निगम

आदित्य नगर, दुर्ग

छत्तीसगढ़

विश्व-साक्षरता दिवस पर

श्रीमती सपना निगम की पुनर्प्रस्तुति

(इस ब्लॉग की सर्वाधिक पढ़ी गई व खोज की गई कविता) 

शिक्षा ले संस्कार जगय

सुग्घर आचार व्यवहार पगय

रहन – सहन के बदले सलीका

अउ दरिद्रता दूर भगय.

सब प्राणी मा श्रेष्ठ मनुस हे

माटी ओखर प्रमान मँगय

जाग रे तँय धरती के बेटा

पढ़े लिखे मा कुछु नइ खँगय.

अपन देस मा हमला आज , शिक्षा के अलख जगाना हे

स्कूल भेजौ बिन नागा के , लइका - मन ला पढ़ाना हे.

अपढ़ रहइया मनखे मन के

बुद्धि भरमा जाथय

बैगा-गुनिया , ढोंगी बबा मन

ओखर फायदा उठाथँय .

जादू-टोना , माया-जाल मा

मनखे मन ला फँसाथँय

अंध-बिस्वास के नाम मा

धंधा अपन चलाथँय.

अशिक्षा , गरीबी  अउ  अंध – बिस्वास   मिटाना  हे

स्कूल भेजौ बिन नागा के , लइका - मन ला पढ़ाना हे.

ननपन मा जो अपढ़ रहिगे

उनला साक्षर बनाना हे

आधा बीच मा छोड़े पढ़ाई

उनला रद्दा देखाना हे.

दिन के काम – काज निपटाबो

संझा पढ़े बर जाना हे

साक्षरता अभियान चलत हे

ओखर फायदा उठाना हे.

शिक्षा  के  अँजोरी  ला  -     देस  मा  बगराना हे

स्कूल भेजौ बिन नागा के , लइका - मन ला पढ़ाना हे.

पढ़ो – बढ़ो अभियान

हमर छत्तीसगढ़ के शान

करत – करत अभ्यास मा

बाँचे ले बढ़थे ज्ञान.

( शब्दार्थ : पगय = चाशनी में पक जाना , भगय = भागना , ओखर =उसका , खँगय = घटना/कमी होना,  हमला = हमें , उनला = उन्हें , नागा = अ‍नुपस्थिति , लइका = बच्चा

ननपन = छोटी उम्र , रद्दा = रास्ता , अँजोरी = रोशनी , बगराना = फैलाना )

P

जन-जागरण (रैबीज़ से बचाव)

- श्रीमती सपना निगम
 

जेठू के रेमटा टूरा ला
कौनों का समझाए
नान नान कुकुर के पिला देखे
ओला बहुत दौड़ाए

दुनों हाथ पसारे वोहा
दुनों गोड़ चकराए
घुरुवा कचरा काँटा खूँटी
कहूँ भी खुसर जाये

कुकुर पिला ला धरे खातिर
भाग दउड़ मचाए
खुदे हपट के गिरे वोहा
एको ठन नई सपड़ाए

चल संगी हम पिला पकड़बो
ओखर दुकान लगाबो
नान नान पिला ला बेचबो
ओऊ पैसा कमाबो

अपन दुसर संगवारी मन ला
पईसा के धौंस देखाबो
पईसा वाले हम बन जाबो
पिकनिक पार्टी मनाबो

अइसने मा फेर चाबिस एक दिन
कुकुर पिला के दाई
दाँत गड़ गे माँस उकलगे
लहू लुहान हो जाई

घर मा आइस रोवत धोवत
होगे हाल बेहाल
14  इनजेक्सन लगाये खातिर 
पहुँच गे असपताल.

(शब्दार्थ : रेमटा = जिसकी नाक सदा बहती रहती हो, टूरा = लड़का, नान-नान = नन्हें-नन्हें, कुकुर के पिला = कुत्ते के बच्चे, ओला = उन्हें, वोहा =वह, गोड़ = पैर, घुरुवा = कचरे का ढेर, खुसर जाये = घुस जाये, ओखर = उसकी, अइसने = ऐसे में, फेर = फिर, चाबिस = काट दी, दाई = माँ, उकलगे = बाहर निकल गया)

{ संदेश :- कुत्तों से बचकर रहें, बच्चों को भी समझायें, यदि किसी को कुत्ते ने काट खाया हो या नाखूनों से नोच दिया हो तो तुरंत अस्पताल जाकर एंटी रैबीज का इंजेक्शन अनिवार्यत: लगावें और डॉक्टर की सलाह लें }

- श्रीमती सपना निगम
आदित्य नगर दुर्ग , छत्तीसगढ़ 

दारू-बंदी (छत्तीसगढ़ी-हास्य)

-सपना अरुण  निगम

कोटवार हर हाका पारिस,
" होगे दारू-बंदी "
तउने दिन ले पीना छोड़ीस
ममा हमर मुकुन्दी.

अपन सुधरगे, मन्दू-संगी
मन ला घलो सुधारिस
हमर गाँव मा अब नइ रहिगे
मनखे लंदी-फंदी.......................

पी के आवै,रोज ठठावै
तउने आज सुधरगे
मनटोरा मामी खुस हो के
बाँटीस लाडू -बूंदी ........................

भगतू भैया ,भामा भौजी
रोज मतावय झगरा
छूटिस पीना,दुन्नो झन मा
होगिस रजामंदी..........................

नत्थू के नाती नंदू जेन
पी के करय हंगामा
मरखंडा गोल्लर ले बनगे
सिधावा बइला नंदी .......................

बोतल संग चाखना लेके
आवत रहिस सुदामा
संझाकुन अब ले के आथय
केरा अउ मुसम्बी.............................

मया-मतौना मा मंगली के   
मंगलू हर बईहागे
मंगली के आगू -पाछू मा
बन के उड़े फुरफुन्दी .........................

अब ले जउन निसा मा दिखही
दाँड़ भुगतना परिही
सरी गाँव वाला मन ओखर
छाँट दिही सब चूंदी...............................

हमर गाँव के मनखे जइसन
कहूँ सुधर सब जातिन
घर-घर मा खुसहाली आतिस
दुरिहा भागतिस तंगी.............................
शब्दार्थ - हाकापारिस  = मुनादीसुनाई  ,तउने = उसी, मन्दू = शराबी , घलो =भी ,ठठावै = पीटना , मतावय =मचाना ,मरखंडा गोल्लर =मारने वाला सांड ,केरा = केला ,बईहागे   ,फुर फुन्दी = भ्रमर चूंदी = केश )

छत्तीसगढ़ महतारी

-         श्रीमती सपना निगम

जय छत्तीसगढ़ जय जोहार

दाई तहीं मोर जीवन आधार....

तोर धुर्रा –माटी मा सनाएंव

तोर खेत-खार मा खेलेंव-खाएंव

तरिया-नदिया मा तोर नहाएंव

तोर गली-खोर मा मँय इतराएंव.

मोर जिनगी हे तोर उधार

दाई तहीं मोर जीवन आधार....

जंगल तोर गजब गदराये

माटी तोर सोंधी महकाये

डोंगरी-पहाड़ी मा बोले मैंना

कोयली कूके, गीत सुनाये.

लहकय तोर तेंदू अउ चार

दाई तहीं मोर जीवन आधार....

तोर बोली हवे मोर चिन्हारी

तँहीं मोर ननपन के संगवारी

तँहीं मोर मयारू महतारी

तँहीं देस के पालनहारी.

तँय दिल के बड़े उदार

दाई तहीं मोर जीवन आधार....

-श्रीमती सपना निगम

आदित्य नगर , दुर्ग

(छत्तीसगढ़)

{ महतारी = माँ , जोहार = अभिवादन / नमस्कार , दाई = माँ , धुर्रा = धूल ,माटी = मिट्टी , तरिया = तालाब , चिन्हारी = पहचान , मयारू = ममतामयी ,तँहीं = तुम ही ,मोर = मेरा , तोर =तेरा }

मोर कुकरा कलगी वाला हे ( गीत )

श्रीमती सपना निगम 

दुनियाँ में सबले निराला हे ....
मोर कुकरा कलगी वाला हे ....

चार बजे उठ जावे ओहा
सरी गाव ला सोरियावे ओहा
माता देवाला के लीम ला चढ़ के
कूकरुसकू नरियावे ओहा

गुरतुर ओखर बोली लागे
गजब चटपटा मसाला हे
मोर कुकरा कलगी वाला हे ....

मोर कुकरा रेंगे मस्ती मा
यही चाल ओखर अंदाजा हे
बस्ती के गली गली किंजरे
सब कुकरी मन के राजा हे

दिल फेंक बड़े दिलवाला हे
मतवाला हे मधुशाला हे
मोर कुकरा कलगी वाला हे ....

ओखर, काँखी मा चितरी पाँखी हे
पंजा मा धारी नाखी हे
पियुरी चोंच हे , ठोनके बर
अऊ जुगुर जुगुर दोनों आँखी हे

ओखर, झबरी पूँछी मा हाला हे
नड्डा मा झूलत बाला हे
मोर कुकरा कलगी वाला हे ....
दुनिया में सबले निराला हे ...

 आदित्य नगर ,दुर्ग  ( छत्तीसगढ़ )

{शब्दार्थ :- मोर=मेरा , कुकरा = मुर्गा ,ओहा = वह , सरी = सारे ,सोरियावे = शोर मचाए , नरियावे = चिल्लाये ,गुरतुर = मधुर या मीठा , ओखर = उसका/उसकी ,किंजरे = भ्रमण करे , कुकरी मनके = मुर्गियों का ,काँखी = बगल , आँखी = आँख ,पाँखी = पंख ,नाखी = नाखून ,चितरी = चितकबरी , पियुरी = पीली, ठोनके बर = ठुनकने के लिये }

साक्षरता को समर्पित : श्रीमती सपना निगम की कविता

शिक्षा ले संस्कार जगय

सुग्घर आचार व्यवहार पगय

रहन – सहन के बदले सलीका

अउ दरिद्रता दूर भगय.

सब प्राणी मा श्रेष्ठ मनुस हे

माटी ओखर प्रमान मँगय

जाग रे तँय धरती के बेटा

पढ़े लिखे मा कुछु नइ खँगय.

अपन देस मा हमला आज , शिक्षा के अलख जगाना हे

स्कूल भेजौ बिन नागा के , लइका - मन ला पढ़ाना हे.

अपढ़ रहइया मनखे मन के

बुद्धि भरमा जाथय

बैगा-गुनिया , ढोंगी बबा मन

ओखर फायदा उठाथँय .

जादू-टोना , माया-जाल मा

मनखे मन ला फँसाथँय

अंध-बिस्वास के नाम मा

धंधा अपन चलाथँय.

अशिक्षा , गरीबी  अउ  अंध – बिस्वास   मिटाना  हे

स्कूल भेजौ बिन नागा के , लइका - मन ला पढ़ाना हे.

ननपन मा जो अपढ़ रहिगे

उनला साक्षर बनाना हे

आधा बीच मा छोड़े पढ़ाई

उनला रद्दा देखाना हे.

दिन के काम – काज निपटाबो

संझा पढ़े बर जाना हे

साक्षरता अभियान चलत हे

ओखर फायदा उठाना हे.

शिक्षा  के  अँजोरी  ला  -     देस  मा  बगराना हे

स्कूल भेजौ बिन नागा के , लइका - मन ला पढ़ाना हे.

पढ़ो – बढ़ो अभियान

हमर छत्तीसगढ़ के शान

करत – करत अभ्यास मा

बाँचे ले बढ़थे ज्ञान.

( शब्दार्थ : पगय = चाशनी में पक जाना , भगय = भागना , ओखर =उसका , खँगय = घटना/कमी होना,  हमला = हमें , उनला = उन्हें , नागा = अ‍नुपस्थिति , लइका = बच्चा , ननपन = छोटी उम्र , रद्दा = रास्ता , अँजोरी = रोशनी , बगराना = फैलाना )